Oktâbrniñ 30-nda Kyivde Mustaqillik meydanında "Kreml siyasiy mabüslerine azatlıq" aktsiyası olıp keçti. Aktsiyada sabıq Kreml mabüsleri, Milliy Meclis azaları, uquq qoruyıcı teşkilâtlarnıñ temsilcileri ve cemaat erbapları iştirak etti, dep haber ete Qırım.Aqiqat mühbiri.
Aktsiya iştirakçileri bugünde işğal etilgen Qırımda yüz bergen esassız tevqiflerge keskin narazılıq bildirdiler ve Rusiye tarafından qanunsız sürette tutulğan er kesniñ, şu cümleden qırımtatarlarnıñ da azat etilmesi içün bütün areketlerniñ faalleştirilmesi talabını seslendirdiler.
"Qırım evi"niñ malümatına köre, Milliy Meclis reisi Refat Çubarov, ukrain rejissörı ve sabıq siyasiy mabüs Oleg Sentsov, Qırım MC Ukraina prezidentiniñ daimiy temsilcisi Anton Körineviç, Ukraina milliy vekili ve sabıq siyasiy mabüs Ahtem Çiygoz qanunsız sürette tutulğan mabüslerge destegini bildirdiler.
Aktsiya iştirakçileri divarnı er birinde siyasiy mabüsniñ adınen sarı ve mavı tüslü yüreçiklernen yarıştırdılar.
Rusiye apsinde tutulğan qırımlılar
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisovanıñ kâtibiyeti 2020 senesi noyabr ayında Rusiye tarafından siyasiy sebeplerden taqip etilgen insanlarnıñ sayısı 130 ola, dep bildirgen edi.
Qırım aq qorçalayıcı gruppasınıñ malümatına köre, 2020 senesi oktâbr ayınıñ soñuna qadar eñ az 110 kişi Qırımda siyasiy sebepli ya da diniy cinaiy taqipler çerçivesinde azatlıqtan marum etildi.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
