Bazar künü, avgustnıñ 23-nde, Ukraina Mustaqilliginiñ 29 yılı munasebetinen ukrain ve qırımtatar artistleri iştirak etecek «Qırım Evi yüreklerni birleştire» dördünci Open Air kontserti ötkerilecektir. Bu aqtak «Qırım Eviniñ» müdiri, rejissör Ahtem Seitablayev Qırım.Aqiqat Radiosınıñ yayınında bildirdi.
«İnternet vastasınen Qırımnen bağlanacaqmız. Bir-birini selâmlap, bir-birine sağlıq tilep olurmız, dep ümüt etem», – dedi Seitablayev.
Rejissör qırımlılar Olga Duhniç ve Pavel Kazarin ile olacaq munaqaşanı ilân etti.
Open Air Kyivdeki «Pıroğovo» Ukraina milliy mimarcılıq ve turmuş müzeyinde olacaq. Kontsert programmasında ukrain ve qırımtatar artistleriniñ çıqışları, munaqaşa, aq qorçalayıcı meydançıq ve ustazlarınıñ yerleri bar.
Saat 17:00-da teşkilâtçılar Open Air kontsert programmasını resmiy qısımdan başlaycaq. Sanada «Musafir» ansambli ve yırcı Lenara Osmanova, «KİYEV» halq oyun ansambli ve «Ad libitum» gruppasınıñ solistleri, «Qırım ailesi» qırımtatar medeniyet merkeziniñ horeografik ansambli, Qırım eviniñ «Küneş» horeografik kollektivi çıqışta bulunacaq. Kontsertniñ soñunda «Usein Bekirovnıñ Triosından» caz muzıkası yanğıracaq.
Saat 16:00-dan başlap qına qoyuv, suvda resim, qırımtatar nağışı ve Rustem Skibin ve studiyasınıñ iştiraki ile çölmekçilik dersleri olacaq. Er kes qırımtatar qavesini pişirmege ögrene ve qırımtatar aşlarınıñ tadına baqa bilecek. Musafirlerni qırımtatar tatlıları bekley.
#PrisonersVoice kampaniyası keçirilecek aq qorçalayıcı meydançıq da olacaq, istegi olğan er kes Kremlniñ siyasiy mabüsi içün varaqanı imzalaması mümkün.
Müzey kirişi paralıdır.
Kezlev memuriyetiniñ kurort ve turizm bölüginiñ sabıq hadimi Sergey Vikarçuk avgustnıñ 24-nde Kyivde Ukraina Mustaqillik Künü paradında «Krım» kolonnasınıñ iştiraki aqqında ilân etti.
Ukraina prezidenti Volodımır Zelenskıy pandemiya şaraitlerinde «Ukraina Mustaqilliginiñ 29 yılını qayd etüv» fermanını imzaladı. Vesiqağa köre, avgustnıñ 23-nde, Ukraina Devlet bayrağı kününde, Kyiv ve diger yerlerde, Ukrainanıñ çeteldeki diplomatik müessiselerinde, arbiy bölüklerde devlet bayrağı tantanalı sürette köterilmeli.
1991 senesi avgustnıñ 24-nde Ukraina öz mustaqilligini (o vaqıtqa qadar Ukraina Sovet Sotsialistik Cumhuriyeti olaraq Sovetler Birligi erkânına kirgen edi) ilân etti. 1991 senesi avgustnıñ 24-nde Ukraina mustaqilligini ilân etüv aktı 1991 senesi dekabrniñ 1-nde umumhalq rey berüvinde tasdıqlandı.
Tek 1992 senesi iyün ayında bu vaqia devlet bayramı oldı, o vaqıt Yuqarı Rada avgustnıñ 24-ni Ukrainanıñ Mustaqillik Künü dep saymağa qarar aldı.
