Dekabrniñ 10-nda saat 14:00-de Kyivde Ukraina buhran media merkezinde #SolidarityWords müellif-vekillerniñ Kremlniñ ukrainalı mabüslerine destek programmasına bağışlanğan matbuat konferentsiyası keçirilecek
Kampaniya çerçivesinde Ukrainada ve çetelde belli olğan yazıcılar ve jurnalistler 12 jurnalistniñ – Rusiyede ve muvaqqat işğal etilgen Qırımda siyasiy sebeplerden apishanelerde ya da ev apsinde tutulğan Ukraina vatandaşlarınıñ destegine çıqışta bulunacaqlar.
Bu matbuat konferentsiyasında böyle spikerler çıqışta bulunacaq:
- ZMINA İnsan aqları merkeziniñ leyha koordinatorı Nadejda Dobrânskaya;
- Ukraina PEN klubınıñ prezidenti, yazıcı Andrey Kurkov;
- Ukraina TİN başınıñ birinci muavini Emine Caparova;
- yazıcı İrena Karpa;
- siyasiy mabüs Vladislava Yesipenkonıñ apayı Yekaterina Yesipenko;
- jurnalist ve uquq qoruyıcı, Seyran Saliyevniñ apayı Mümine Saliyeva.
Moderator: Ukraina PEN klubınıñ icra müdiri Tatyana Teren.
Dekabrniñ 1-nde Ukraina PEN klubı ve ZMINA İnsan aqları merkezi meşur ukrain yazıcıları ve jurnalistleri ile beraber #SolidarityWords müellif-vekillerniñ Kremlniñ ukrainalı mabüslerine destek programmasını başlattı.
Rusiye apsinde tutulğan qırımlılar
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisovanıñ kâtibiyeti 2020 senesi noyabr ayında Rusiye tarafından siyasiy sebeplerden taqip etilgen insanlarnıñ sayısı 130 ola, dep bildirgen edi.
Qırım aq qorçalayıcı gruppasınıñ malümatına köre, 2020 senesi oktâbr ayınıñ soñuna qadar eñ az 110 kişi Qırımda siyasiy sebepli ya da diniy cinaiy taqipler çerçivesinde azatlıqtan marum etildi.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
