Bugün, avgustnıñ 24-ünde, Ukraina, Mustaqillikniñ 28 yıllığını qutlay. Kyivniñ Hreşçatık baş soqağında arbiy parad yerine "Menlik Marşı" keçe.
Mustaqillik meydanında resmiy merasimler saat 9:30 başlanacaq. Sükünet daqqasından soñ, Cennetli Yüz Qaramannıñ hatırasına yüz kere çañ qaqılacaq.
"Menlik Marşı". Hreşçatıkta, askerler, ocalar, ekimlerm sportçular ve qoranatsı ile prezident ve başqa memurlarnıñ iştiraginen "Menlik marşı" keçecek.
Marşnı klip yapıcı Alan Badoyev ve horeograf Olena Kolâdenko azırladı.
"Rejissörlar arbiy tahnikadan aselet vazgeçti, olar arbiy timsallerge degil de, insanğa diqqatnı celp etmege istedi", - dep aytıp berdi "TSN"ge intervyü bergende Alan Badoyev.
Onıñ aytqanına köre, memleket tarihini yapqan istidatlı ukrainler bayramnıñ esas qaramanları olacaq.
Marşta yüzge yaqın adam iştirak etecek. Mustaqillik meydanında balaban dekoratsiyalar ya da mahsus inşaatlar da olmaycaq. Amma, teşkilciler qayd etkeni kibi, Cennetli Yüz Qaraman alleyasında "Berkut" qalaqanı ve 2014 senesi uruş vaqtında yolnı qapatqan yanğın maşnası sıfatında bir qaç bediiy instalâtsiya tiklenilecek.
Veteranlar marşı. Soñra öz marşını veteranlar ve faaller keçirecek. Qorçalayıcılar Marşı iştirakçileri saat 10:00 Şevçeko adına parkta toplaşacaq. Halq paradı, saat 11:00 Taras Şevçenko adına Kyiv milliy universitetiniñ qırmızı korpusından başlanacaq.
Veteranlar "paradı"nıñ esas şartı - partiya ya da başqa bir timsalâtınıñ olmaması. Kyivden ğayrı, böyle marşlar daa beş şeerde keçirilecek - Mıkolayiv, İlbav (Lviv), Zaporijjâ, Sumı ve Odessa.
