Dekabr 17-de aqşam Kyivde Mustaqillik MeydanındaFSB Qara deñizde zapt etken ukrain arbiylerine ve Qırım ve Rusiyede bulunğan ukrain siyasiy mabüslerine destek aktsiyası keçti.
Qırım.Aqiqat muhbiri bildirgenine köre, 200-ge yaqın adam ukrain siyasiy mabüsleriniñ süretleri ve olarnıñ adları yazılğan bannernen Maydanğa çıqtı.
Aktsiya devamında mahsus mektüplerde ukrain siyasiy mabüslerine qoltutuv sözlerini yazmağa bütün istegenlerge teklif etildi. Olarnı tevfiq etilgen ukrainlerge yollamağa söz berildi.
Aktsiyanı ukrainlerniñ rusiye advikatları Nikolay Polozov ve İlya Novikov ziyaret etti ve böyle tedbirlerniñ zapt etilgen arbiyler içün büyük qiymeti olğanını qayd ettiler.
“Türmelerde bulunğan bütün siyasiy mabüsler, cenk esiri olğan deñizciler içün öz memleketinden ve tuvğanlarında destek körmege pek müim. Tamam bu destek olarğa rusiye apishanelerindeki basqınç şaraitinde küç bere”, - dedi Polozov aktsiyada.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
