Kyivde «Qırım evinde» ananeviy nağışlarnen bezetilgen qırımtatar urbasınıñ sergisi ötkerilecek. Tedbir ukraina şairesi ve yazıcısı Lesâ Ukrayınka doğğanınıñ 150 yılı munasebetinen keçirilecek.
«Taqdim etilecek sergi ukrain milliy yañıdan doğuvınıñ başında turğan meşur ukrainlerniñ ğayrıdan tiklengen kölmeklerinen tanış olmağa imkân berecek: Taras Şevçenko, Lesâ Ukrayınka, Mıhaylo Starıtskıy, İvan Franko, Dmıtro Yavornıtskıy, Maksım Rılskıy, Mariya Zankovetska, Mıkola Sadovıy ve Skoropadskıy ve Kosaçevler qorantasınıñ nağışlı qıyavet örnekleri», – dep aytıla «Qırım eviniñ» haberinde.
Ananeviy nağışlanğan qırımtatar urba kollektsiyasını dizayner Elmira Kataki taqdim etecek. O, Lesâ Ukrayınkanıñ Qırımda toplağan örneklerinen milliy taqiyeni bezetti.
Sergiden ğayrı, pianocı ve bestekâr Usein Bekirov ve banduracı Volodımır Voytnıñ icrasında qırımtatar ve ukrain muzıkası yanğıraycaq.
Sergi fevralniñ 24-nde saat 16:00-da olacaq ve fevralniñ 25-nde de «Qırım evinde» çalışacaq. Kiriş serbesttir.
Yaltada ukrain yazıcısı ve şairesi Lesâ Ukrayınka doğğanınıñ 150 yılı munasebetinen bir sıra tedbir keçirilmesi planlaştırıla.
Ukrain şairesi, yazıcısı ve terciman Lesâ Ukrayınka 1871 senesi fevralniñ 25-nde Jıtomır vilâyetiniñ Novoğrad-Volınskıy şeerinde dünyağa keldi.
Yazıcınıñ kerçek adı – Larısa Petrivna Kosaç-Kvitka. Lesâ Ukrayınka şiiriyet, destan, drama, publitsistika, halq ağız yaratıcılığı janrında yazdı. Qırq eki yaşından aman-aman üç yılını Lesâ Ukrayınka Qırımda qaldı. O, «Qırım hatıraları» ve «Qırım sedaları» şiirlerini Qırımğa bağışladı.
