Kyivde noyabrniñ 20-nde uydu çekimleriniñ malümatları esasında Qırımdaki suv resurslarını monitoring neticelerini taqdim etkenler. Olarğa köre, yarımadanıñ «suv küzgüsi meydanı» 2020 senesi 2015 senesine baqqanda orta esapnen 32%-ğa eksildi.
Tedqiqatnı Qırımtatar Resurs Merkezi taqdim etti.
«Qırım yarımadasınıñ suv resursları problemi 2020 senesiniñ qurğaq yazından soñ büyük diqqat celp etti, bir çoq kütleviy haber vastasında ealige yetmegen suv ve quruğan suv anbarları aqqında malümat peyda olıp başladı. Qırımtatar Resurs Merkeziniñ ekspertleri vaziyetni, bu problemniñ büyükligi ve sebeplerini talil etmek içün açıq uydu malümatlarını qullandı», – dep bildirdi teşkilâtçılar.
Taqdim merasiminde Agroekologiya ve tabiatnı qullanuv institutınıñ ilmiy hadimi Tatyana Kuçma bu müddet devamında Otarköy suv anbarında suv eki qat eksildi, Açi gölü aman-aman qurudı, Aqmescit suv anbarında da suvnıñ bayağı eksilgeni körüne, dep bildirdi. Umumen, Qırım suv anbarlarınıñ meydanı 43%-ğa, göller 25%-ğa eksildi.
Körbekteki suv anbarı. Suv nasıl kete (fotoresimler)
Noyabrniñ 18-nda «Voda Krıma» Devlet unitar müessisesiniñ istisal müdiri İgor Daniloviçniñ aytqanına köre, Aqmescit suv anbarınıñ 36 mln leyha köleminden 4,900 qaldı. Partizan – 34 mlnden 5 mln kub, Ayan – 3,900-dan tek 300 biñ kubometr qaldı. «Voda Krıma» müessisesiniñ yolbaşçısı Vladimir Bajenok, Aqmescitten ğarpta olğan yerastı çoqraqlardan künde 80 biñ kubometrge qadar suv çıqarıp başlaycaqlar, dep bildirgen edi.
Qırımnıñ Rusiye yolbaşçısı Sergey Aksenovnıñ tahminlerine köre, ealige suv berüv cedveli daa eñ az bir yıl olacaq.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
