Kyiv şeer yolbaşçısı Vitaliy Kliçko paytahtnıñ sakinlerini 35 saat devam etecek komendant saatlarına azırlanmağa çağırdı.
«Bugün – zor ve telükeli bir an. Arbiy komandanlıqnıñ qararınen, bugün – martnıñ 15-i, saat 20:00-dan başlap – Kyivde komendant saatları ilân etile. Şeerde mahsus izin olmasa, areket etmege yasaq olacaq. Tek sığınaqqa barmaq içün çıqmaq mümkün. Komendnant saatları martnıñ 17-si saba 7-ge qadar devam etecek. Şu sebepten kyivlilerden eki kün evde ya da, telüke signalı olsa, sığınaqta olmaq içün azırlıq körmege rica etem», – dep yazdı Kliçko.
Aynı tedbirler Kyiv vilâyetinde de olacaq, dep bildirdi vilâyet memuriyeti.
Bundan evelki devamlı komendant saatları Kyivde martnıñ 6-nda saat 7:00-da yekünlendi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
