Kyivdeki Rusiye elçihanesi ögünde faaller halq deputatlarından insaniyetlilikke qarşı cinayetler, arbiy cinayetler ve istilâ içün ceza berilmesini belgilegen qanun leyhasını (№9438) qabul etmesini talap etti.
Aktsiyanı Ukraina Helsinki insan aqları birligi teşkil etti. «Kremlniñ siyasiy mabüsleriniñ tuvğanları» cemaat birleşmesiniñ vekilleri aktsiyağa qoltutmağa keldi, dep bildire Qırım.Aqiqat mühbiri.
Faallerniñ bildirgenine köre, Ukraina qanunları halqara qanunlar kibi hususan Qırım ve Donbasta arbiy cinayetler ve insaniyetlilikke qarşı cinayet işlegen insanlarnıñ cezalandıruvını belgilemey.
«Donbasta ya da Qırımda ukrainalılarnı işkencege oğratqan insanlarnı mesüliyetke çekmege imkân bergen bir de bir norma ya da qanun maddesi yoq. Bizler aqım, boğuv, beden zorbalıq ile işkencege oğratqan quvetçiler ve arbiylerniñ areketlerini aytamız. Bugünde-bugün, Ukraina qanunlarına köre, bular yımşaq şekilde cezalandırıla bile. Şu sebepten Yuqarı Radadan milliy qanunlarnı halqara normalarğa uyğunlaştırmasını talap etemiz, bunıñ kibi cinayetler içün ceza olmalı», – dep tarif etti İgor Kotelânets, «ukrain diversantları davası» boyunca mahküm etilgen Yevğen Panovnıñ qardaşı.
Mart ayında ABD Devlet departamenti dünyada insan aqlarına dair er yıl azırlağan maruzanı taqdim etti. Vesiqada işğal altındaki Qırım aqqında da söz yürsetildi. Devlet departamentiniñ qayd etkenine köre, yarımadada insanlar hırsızlana, işkencege oğratıla, siyasiy sebeplerden qanunsız şekilde apiske alına.
