Kyivdeki «Qırım evinde» fevralniñ 22-nde «Ukrainanıñ tuzı. Boysunmağan Qırım ile birdemlik künü» aktsiyası keçirilecek. Onıñ çerçivesinde Qırımnıñ Rusiye işğaliniñ altıncı yılına bağışlanğan bir sıra aq qorçalayıcı ve bediiy tedbirlerniñ keçirilüvi planlaştırıla.
Aktsiyanı «Qırım evi», Vatandaş serbestligi merkezi, Ukraina PEN klubı, «KrımSOS» aq qorçalayıcı teşkilâtı ve Qırım.Aqiqat teşkil eteler.
«Bizni Qırım ğayıp oldı, dep qandıralar. Amma biz bu ğayıpnı ne vaqıt qabul etsek, o vaqıt Qırım kerçekten keter. Teslim olmasaq, özüni bir memleket olaraq is etsek, Qırım yeli, qumı ve tuzını unutmasaq – bir şey bitmeycek, bu zıddiyetni yutturdıq dep aytmaq içün daa erte, ğayıp ve yeñilüv aqqında aytmaqnıñ vaqtı degil», – dep yazdı ukrain yazıcısı Serğiy Jadan tedbirniñ ilânında.
Aktsiya çerçivesinde «Ümütsizlikniñ dermanı: zemaneviy Qırım tarihınıñ dersleri» munaqaşasınıñ keçirilüvi planlaştırıla. Anda qırımtatar halqınıñ lideri Mustafa Cemilev, «Ukrayınska pravda» baş muarriri Sevgil Musayeva, UA: Krım icra prodüseri Osman Paşayev, «Qırım evi» programm müdiri Alim Aliyev ve «Novoye vremâ» jurnalisti Olga Duhniç iştirak etecekler.
Teşkilâtçılarnıñ malümatına köre, subet iştirakçileri Qırım işğaliniñ altı yılı ne ögretti dep laf etecekler, birdemlikniñ küçü, destek ve ilerideki areketler strategiyası aqqında aytacaqlar.
Qırım.Aqiqat jurnalisti Taras İbragimovnıñ fotoresimler sergisi de olacaq.
«FSB jurnalistniñ Qırımğa kirişini yasaqlamazdan evelki dört yıl devamında o, yarımadada qırımtatarlar ve ukrainlerge qarşı siyasiy sebeplerden açılğan davalarnı aydınlatqan edi. Tarasnıñ fotoları – baqışları içün taqip etilgen insanlarnıñ ikâye vaqianamesidir», – dep qayd ete teşkilâtçılar.
Aktsiya çerçivesinde «Azatlıq işğali» teatr sanalaştırıluvı olacaq, Kyiv medeniyet ve sanat milliy universitetiniñ oyunca studentleri soñki altı yılnıñ yarımada müitini kösterecekler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
