Kyivde çarşenbe künü, noyabrniñ 25-nde, aq qorçalayıcılar ve alimler yarımada askeriyleştirilüvi sebebinden Qırımda bala aqları bozulğanını aydınlatıp, Ukraina içün qırımlı gençlerni qoruv tevsiyelerini berecekler. Bu aqta «Rusiye askeriyleştirgen Qırımda balalarnı nasıl qorumaq mümkün» matbuat konferentsiyasında aytılacaq.
«Qırımlı balalar soñki altı yıl devamında işğalde yaşay. Rusiye Federatsiyasınıñ akimiyeti balalarnıñ aqlarını bütün saalarda boza. Askeriyleştirüv tedbirleri vaqtında sağlıqlarını telükege oğratuv, zorlap berilgen vatandaşlıq, Rusiye kimligini qabul ettirüv, mustaqil malümat menbalarınıñ qapatıluvı, ana tilinde tasil aluv imkânlarından marum etüv ve Ukraina kontrolindeki oquv yurtlarına qatnavda yapılğan manialar», – dep aytıla tedbir ilânında.
Qayd etilgenine köre, aq qorçalayıcılar bu bozuvlarnıñ delillerini topladı, noyabr ayında olar BM bala aqları Komitetine berilecek.
Oktâbr ayında berilgen malümatqa köre, qırımlı mektep talebelerini «arbiy-vatanperverlik terbiyesi» programması çerçivesinde Kaliningradğa yollaycaq olalar.
2020 senesi iyül ayında Rusiye Devlet duması prezident Vladimir Putin teklif etken tasil qanunınıñ deñişmelerini soñki üçünci oquvda qabul etti. Olar mektepteki terbiye işinen bağlı. Vesiqanıñ yañı metninde gençlerniñ arbiy-vatanperver terbiyesi aqqında aytıla.
Daa evel berilgen malümatqa köre, Qırım Muhtar Cumhuriyeti ve Aqyar Prokuraturası Qırım aq qorçalayıcı gruppasınen beraber Gaagadaki Halqara cinaiy mahkemege Qırımda balalarnıñ askeriyleştirilüvinen bağlı malümat yolladı.
Rusiye akimiyeti Qırım mekteplerinde kadet sınıflarını aça ve talebelerni «Yunarmiya» arbiy-vatanperver areketine qabul ete. Balalar silâ bozıp toplamağa, ateş açmağa, kamuflâj taqmağa ve sıranen yürmege ögrene.
Ukraina aq qorçalayıcıları işğal etilgen Qırımda balalarğa berilgen terbiye arbiy formatta yapıla, dep qayd etken edi. Psihologlar Rusiyeniñ zemaneviy tasilinde balalarnıñ añlavına basqı yapıla, dep qayd ete.
Qırım Muhtar Cumhuriyetiniñ prokuraturası Qırımda «balalar arasında yapılğan cenk propagandası» sebebinden tahqiqat başlattı.
