Bu afta Kyivde qırımtatar rejissörı Ahtem Seitablayevniñ Mirnıy-21/Myrnyi-21 yañı filminiñ çekişleri başlandı. Bunı Ukraina kino meselelerinden Devlet agentligi haber ete.
«Bu, arbiylerini separatistlerniñ ve Rusiye mahsus hızmetleriniñ memleketlerine hainlik ettirmege muvafaqiyetsiz tırşqan Lugansk sıñız müfrezesiniñ ikâyesi. Film 2014 senesi iyün ayında Ukraina şarqında yüz bergen kerçek adiselerge esaslana», – dep haber etile bildirmede.
Birinci levhalar Kyivniñ merkezinde Mıhayliskıy kilsesinde çıqarıldı. Mıhaylivska meydanında filmniñ rejissörı ve prodüseri Ahtem Seitablayev birinci çekiş künü munasebeti ile tepsi sındırdı.
Çekişler Kyivde ve Kyiv vilâyetindeki Vasilkov şeeriniñ Arbiy qısmında olacaq.
Filmniñ premyerası 2021 snesi aprel ayına planlaştırılğan.
Ahtem Seitablayev «Haytarma», «Başqasınıñ duası», «Kiborğı» ve diger filmlerinde yapqan rejissörlıq işinen bellidir. Soñki vaqıtları qırımtatar asıllı ukrainalı rejissör Oleg Sentsovnıñ «Nomera» levhası üzerinde çalıştı. Ahtem 25-ten çoq film ve serialda oynadı. Yañı soylarından biri – Nariman Aliyevniñ «Evge»filmindeki baş rolü. Bu levha 72-nci Cannes halqara kinofestivaliniñ programmasında ve 10-uncı Odesa halqara kinofestivaliniñ Gran-prisini qazandı.
