Kyivde Avropa Birliginiñ temsilciligi ögünde Donbasnıñ işğal etilgen topraqlarında, işğal altındaki Qırımda ve qomşu Rusiyede tutulğan ukrainalı siyasiy mabüs ve esirlerge qoltutuv aktsiyası olıp keçti.
Faaller elçihaneniñ merdiveninde turıp, Oleg Sentsov, Stanislav Klıh, Aleksandr Kolçenko, Aleksandr Korinkov, Vladimir Baluh, Sergey Glondar, Stanislav Aseyev, noyabrniñ soñunda zapt etilgen ukrain deñizcileri ve digerlerniñ fotoresimlerini tuttı. Let My People Go aq qorçalayıcı teşebbüsiniñ malümatına köre, Rusiye 70 ukrainalını siyasiy sebeplerden tuta. Bundan ğayrı, 24 cenk esiri olğan Ukraina deñiz askeri Moskva nezarethanelerinde buluna.
Avropa Şurasınıñ Parlament assambleyası 2018 senesi iyünniñ 28-nde Rusiyede ve Ukrainanıñ kontroli altında olmağan topraqlarda ukrainalı mabüslerni azat etmek talabı ile qararnı qabul etken edi.
Avropa parlamenti Rusiyeni qanunsız tutulğan, apiske alınğan bütün ukrainalı siyasiy esirlerni azat etmesine çağırğan edi.
Siyasiy mabüslerniñ cedvelleri Türkiye prezidenti Recep Tayyip Erdoğanğa berilgen edi.
