Ukraina prezidenti olaraq saylanğan Volodımır Zelenskıy cumaertesi künü Yuqarı Rada reisi Andriy Parubiy ve fraktsiya liderlerinen körüşmek içün Ukraina Yuqarı Radasınıñ binasına keldi. Bu aqta Azatlıq Radiosı haber ete.
Zelenskıynıñ körüşüv başlamazdan evel bildirgenine köre, esas mevzu mayısnıñ 19-nda parlamentte keçirilmesi tahmin etilgen inauguratsiya olacaq.
Zelenskıy bugün raatlıq künü olğanı içün parlamentteki körüşüvge bütün fraktsiyalarnıñ liderleri kelmeycek, dep tahmin etti.
Yuqarı Radada Ukraina prezidenti inauguratsiyasınıñ 2019 senesi mayısnıñ 19-nda ötkerilmesine dair qarar qayd etildi. İnauguratsiya resmiy neticeler ilân etilgen kününden 30 kün içinde, yani iyünniñ 3-ne qadar, ötkerilmeli. Prezident Yuqarı Radanıñ tantanalı toplaşuvında Ukraina halqına ant etmeli.
