Rusiyeniñ Kyiv vilâyetine qarşı raketa darbeleri sebebinden 34 kişi yaralandı, beşi – bala, dep bildirdi vilâyetniñ arbiy memuriyet yolbaşçısı Oleksiy Kuleba.
«Kyiv vilâyeti. 34 kişi yaralandı. Beşi bala. Dört insan elâk oldı. İhtiyacı olğan er keske vaqtınca yer beremiz», – dep yazdı o, Telegramda. Kritik infrastruktura, hususan hastahaneler generatorlarnen çalışa.
Aynı vaqıtta Kyiv vilâyeti polisiniñ reberi Andriy Nebitov Rusiye raketasınıñ Vışğorodqa qarşı ücümi neticesinde 4 insan elâk oldı, daa 27 kişi yaralandı, dep bildirdi. Onıñ malümatına köre, 6 energetikçi kritik infrastrukturağa qarşı yapılğan raketa ücümi neticesinde yaralandı.
«Ateş neticesinde Fastiv rayonında mustaqil ev viran etildi. Mında, çoq şükür, yaralanğanlar yoq», – dep qoştı Nebitov.
Vilâyetniñ arbiy memuriyeti bir kişi elâk oldı ve 20 kişi yaralandı, dep bildirdi. Kritik infrastruktura obyektleri, Vışğoroddaki çoq qatlı bina ve Çabanıdaki mustaqil evge raketa tüşti, dep aytıldı.
Noyabrniñ 23-nde Rusiye Kyiv ve diger Ukrayına şeerlerine qarşı kene raketalarnen ücüm etti.
Moskva bir sıra delil olğanına baqmadan, vatandaşlarğa qarşı ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
