Kyiv vilâyetinde martnıñ 19-nda Ukrayina silâlı quvetleriniñ «Rif» tahallüsli serjantı olğan qırımtatarı defin etilecek. Bu aqta Qırımtatar Milliy Meclisiniñ reisi Refat Çubarov bildirdi.
Onıñ aytqanına köre, Rusiye ordusı Qırımnı işğal etken soñ erkek Ukrayina ordusına qoşulıp, 2021 senesi iyün ayına qadar Donbastaki uruşlarda iştirak etti.
«2022 senesi fevral ayında Rusiye ordusı büyük istilâ başlatqan soñ o, Rusiye işğalcileri tarafından tutulıp, deşetli işkencelerge oğratıldı ve 2022 senesi aprel ayında öldürildi. Bu yıllar devamında serjant Rifniñ ömür arqadaşı aqayınıñ naaşını almaq ve musulman adetlerine köre defin etmek içün elinden kelgenini yaptı», – dep tarif etti Refat Çubarov.
Cenaze bu adreste olacaq: Çayki köyü, Ğruşevskıy soq., 3.
Bundan evel Qırımtatar Milliy Meclisiniñ lideri Mustafa Cemilevniñ Qırım.Aqiqatqa bildirgenine köre, Ukrayina silâlı quvetleri erkânında tahminen 2 biñ qırımtatarı bar.
O, Rusiye ile cenkte elâk olğan qırımtatarlarnıñ tam sayısını aytmadı, çünki «Qırımda FSB soy-soplarına basqı yapıp başlay».
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
