Aqyarda iyün 5-inde daa eki yañı koronavirus adisesi qayd etildi.
Şeerniñ rusiyeli ükümeti bildirgeni kibi, Sankt-Peterburgdan qaytqan adamnıñ testi müsbet oldı. Bir kün evel onen beraber seyaat etken soyunıñ diagnozı tasdıqlandı.
Akimiyet, daa bir hasta aqyarlı Kyivden qaytqanını bildire, o observatorda edi, şimdi ise Aqmescitte tedaviylene.
İnfektsiya hastahanesinde 77 adam nezaret etil, 9-ıncı şeer hastahanesinde - 77. Yaşağan yerlerinde 1278 adam nezaret altında buluna.
Umumen Qırımda 413 koronavirus hastası qayd etildi. 29-ı çetelden keldi, 74-ü – qomşu Rusiyeden. 297 insan tüzeldi. 12 COVID-19 hastası vefat etti. Aqyarda koronavirus qırğınlığı başlağanından berli 171 kişi hastalandı, üç insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
