Yanvarniñ 2-nde saba Kyiv ve Harkiv büyük raketa ücümine oğradılar, dep haber ete yerli akimiyet.
Kyiv arbiy memuriyetiniñ malümatına köre, raketa parçaları Peçersk rayonında çoq qatlı binanıñ damına tüşti. Obolon rayonında anbarlarğa, Ğolosiyıvskıy rayonında – parkqa. Svâtoşın rayonında da parçalar tüşti, dep haber etile.
Ukrayına paytahtınıñ bir qaç rayonında elektrikler yoq. Eñ az 10 insan Solomenskıy rayonında yaralandı – anda raketa ücümi neticesinde yanğın çıqtı.
Harkivde, şeer yolbaşçısı İğor Terehovnıñ bildirgenine köre, patlavlar eşitile. Onıñ malümatına köre, şeerge dört darbe endirildi, hususan merkezge. «Sığınaqta bulunmamaq pek telükeli», – dep qayd etti memur.
Vilâyetniñ arbiy memuriyet reisi Oleg Sinegubov 20 yaralanğan ve bir elâk olğan aqqında bildire.
Odesa ve Odesa vilâyeti muntazam sürette Rusiye dronları ve raketalarınıñ ücümlerine oğray. Hususan, dekabrniñ 29-nda vilâyet merkezinde yüz bergen büyük ücümde beş insan elâk oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
