Kyivde Rusiye zapt etken ukrain deñizcilerni ziyaret etmek içün soylarına aqça toplanılıp başladı. Anda kelecek afta 24 deñizciniñ mahkemesi olmalı. Bu aqta aprelniñ 9-ında Facebookta ukrain ombudsmen Lüdmila Denisovanıñ matbuat hızmeti bildirdi.
“Balalar endi aman-aman beş ay Moskovada Lefortova SİZOsında tutula. Olarğa daima basqı yapıla, olar tuvğanlarınıñ destegine muhtac. Öz oğul, ağa, qardaş ve aqaylarını körmek içün, adamlar Ukrainanıñ çeşit köşelerinden toplanıp mahkemege ketmege azırlana.Moskovağa bilet almaq içün bayağı para kere”, - denile beyanatta.
Bu maqsat ile esap açıldı ve endi 30 500 grivna toplanıldı, dep bildire matbuat hızmeti.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
