Kyivde mayısnıñ 24-nde Rusiye ücümi neticesinde yaralanğanlarnıñ sayısı arttı, dep haber ete Devlet fevqulâde vaziyetler hızmeti bazarertesi sabası.
Al-azırda paytahtta yaralanğan 87 insan aqqında belli, üçü bala. Eki insan can berdi. Hızmet paytahtnıñ 49 yerinde vatandaş ve memuri infrastruktura obyektleriniñ zarar körgenini qayd etti.
"Darbe neticesinde beş qatlı binanıñ kirişi yoq etilgen Şevçenko rayonında elâk olğan eki qadınnıñ cesedi çıqarıldı", – dep qayd ete Devlet fevqulâde vaziyetler hızmeti.
Qurtarıcılar zarar körgen demir beton plitalarınıñ 165 metr kâresini çıqardı. Kinologlar 100 metr kâreden ziyade teşkerddi, psihologlar ise 112 insanğa yardım etti. Aqibetlerni yoq etmege devam eteler.
Kyiv şeeriniñ arbiy memuriyet yolbaşçısı Timur Tkaçenko paytahtta yaralanğan 86 insan aqqında bildirdi. Onıñ aytqanına köre, bir çoq insan sığınaqta olğanı içün sağ qaldı.
Mayısnıñ 24-nde gece Ukrayina Rusiyeniñ kütleviy ücümine oğradı. Ukrayina Silâlı quvetleriniñ Ava küçleri bergen malümatqa köre, Rusiye ordusı Ukrayinağa 600 çeşit uçucısız ve 90 ava, deñiz ve qarada olğan raketanen ücüm etti, darbeniñ esas yönelişi Kyiv oldı. Umumen Ukrayinada dört kişi elâk oldı, yüzlernen insan yaralandı.
Kyivde Rusiye ücümi neticesinde eki insan elâk oldı. Şevçenko, Darnıtsâ, Desnânskıy, Obolon ve Ğolosiyıvskıy rayonlarında 40-tan ziyade yerde zararlar qayd etildi.
İç işler nazirliginiñ malümatına köre, Kyivde ücüm sebebinden çoq daireli ve mustaqil evler, alış-veriş merkezleri, oquv yurtları, bazar, Devlet fevqulâde vaziyetler hızmeti ve polis memuriy binaları, Çernobıl Milliy müzeyi zarar kördiler.
Rusiye Mudafaa nazirligi "Ukrayinanıñ arbiy idare, ava bazaları veye mudafaa-sanayı kompleksiniñ müessiselerine qarşı" dron ve raketalar, hususan "Oreşnik" ballistik raketalarınen kütleviy ücüm yapqanını bildirdi.
