Kyiv üçünci gece ardı-sıra rus dronlarınıñ büyük ücümine oğray, telüke altı saat devam etti, dep bildirdi şeerniñ arbiy memuriyet yolbaşçısı Timur Tkaçenko.
Ücüm neticesinde Dniprovskıy rayonı zarar kördi, bir mesken evniñ camları qırıldı. «Garaj kooperativi ve raatlıq müessisesinde tüşken parçalar qayd etildi», – dedi Tkaçenko. Yaralanğan ve ölgenler yoq.
Odesa vilâyetinde dronlarnıñ ücümi yanğınlarğa sebep oldı, mustaqil evler, garaj, maşinalar ve gaz boru yolu da zarar körgenler. Kimse yaralanmadı, dep haber ete Ukrayina devlet fevqulâde vaziyetler hızmeti.
Zaporijjâ vilâyetinde Rusiye ordusı Yurkovka köyüne ücüm etti, mustaqil ev darbege oğradı. Patlav dalğası evlerge ve yanlarında turğan maşinalarğa zarar ketirdi, dep bildirdi vilâyetniñ memuriyet yolbaşçısı İvan Fedorov. Ücüm neticesinde eki kişi yaralandı – 60 yaşında qadın ve 52 yaşında erkek.
Hmelnıtsk vilâyetinde mustaqil evler ve müessiseler zarar kördi, ilk malümatqa köre, yaralanğanlar yoq.
Bazar kününe keçer gecesi Rusiyeniñ Ukrayinağa qarşı kütleviy ücüminden soñ ABD prezidenti Donald Trump Rusiye prezidenti Vladimir Putinni tenqit etti.
Truth Social içtimaiy ağında o, «Vladimir Putinnen munasebetleri er vaqıt yahşı edi, amma oña bir şey oldı», dep yazdı.
«Delirdi! Bir sebep olmağanda o qadar insannı öldüre, ve men tek askerlerni aytmayım. Ukrayinanıñ şeerlerine sebepsiz bir şekilde raketa ve uçucısızlarnen ura», – dedi Trump. Amerika prezidentiniñ fikirince, Putin bütün Ukrayinanı zapt etse, «bu Rusiyeniñ yıqıluvına sebep olur».
Bundan ğayrı, Trump, onıñ fikirince, «memleketine yahşı bir şey yapmağan» Zelenskıynı tenqit etti.
«Aytqan er şeyi mesele çıqara, bunı begenmeyim, ve bunı toqtatmaq kerek», – dep yazdı Trump.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
