«Paytahtta gece ava telükesi eki kere ilân etildi ve umumen eki buçuq saat devam etti. Ava mudafaa, radioelektron küreş quvetleri ve vastaları Kyivge qarşı telükeli olğan bütün Rusiye dronlarını yoq etti», – dep aytıla haberde.
Kyiv şeeriniñ arbiy memuriyeti bildirgenine köre, şeerniñ Podil rayonında parçalar tüşken soñ açıq alanda yanğın çıqtı, onı söndürgenler. «Eki qatlı mesken evniñ ve bir memuriy binanıñ pencereleri de zarar kördi. Yüksek kerginlikli elektrik hattına zarar kelgeni aqqında da malümat bar. Yaralanğanlar aqqında malümat yoq», – dep bildirdi akimiyet.
Bir kün evelsi Kiyivniñ Solomenskıy rayonında tüşürilgen Rusiye dronınıñ parçalarından yanğın çıqtı ve doquz adam yaralandı.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusı Ukrayinanıñ şeer ve köyleriniñ grajdan infrastrukturalarına, vatandaş ealisini öldürgenine ve hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
