Ukrayına Silâlı quvetleriniñ Baş komandanı Valeriy Zalujnıy Rusiye ordusı kene Kyivge ücüm etmege tırışacaq, dep bekley. Bu aqta o, dekabrniñ 15-nde The Economist neşirine bergen intervyüsında ayttı.
«Rusiyeliler tahminen 200 000 yañı asker azırlay. Kyivge kene ücüm etmege tırıcaqlarından şübhem yoq», – dep ayttı Zalujnıy.
Neşir Valeriy Zalujnıynıñ aytqanlarına esaslanıp, Rusiye yanvar ayında ya da baarde Donbastan, cenüpten ya da atta Beyazrusiyeden büyük ücüm başlata bile, dep yaza.
The Economist cebeniñ 1000 km-sinde bir ay devamında areket aman-aman yoq edi, dep qayd ete, ve Britaniya admiralı Entoni Radakinniñ aytqanlarına diqqat etip, top snarâdlarınıñ yeterli olmağanı Rusiyeniñ yerustü operatsiyaları içün imkânları «tez eksilgenini» köstere, dep bildire.
Rusiye fevralniñ 24-nde saba Ukrayınağa büyük arbiy istilâ başlattı. Rusiye ordusı şimalden Kyivge taba areket etti. Aprelniñ başında Kyiv vilâyeti Rusiye ordusından azat etildi.
Ukrayına Silâlı quvetleriniñ Baş ştabı oktâbrniñ ortasında Beyazrusiyede başlağan Rusiye arbiy bulunuvınıñ arttırıluvı devam ete, amma o memleketten ücüm operatsiyasınıñ ihtimalını Ukrayına Baş ştabı kiçik dep saya.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
