Ukraina tarafı martnıñ 27-nde Üç taraflı bağ gruppasınıñ toplaşuvında Ukrainada mahküm etilgen Rusiye vatandaşlarınıñ Kremlniñ ukrainalı reinelerine deñiştirilüv kününi belgilemege talap etecek, dep bildire Yuqarı Radanıñ spiker muavini, Ukrainanıñ Üç taraflı bağ gruppasınıñ gumanitar alt gruppasındaki vekili İrına Geraşçenko.
«Martta azat etmege teklif etemiz. Soñki 16 ay içinde Rusiyege on altıncı kere muracaat etip, bizimkilerni qaytarıp, olarnıñkilerini almasını talap ettik», – dep bildirdi Geraşçenko.
Onıñ aytqanına köre, deñiştirilecekler cedvelinde Kyiv teslim etmege azır olğan 25 rusiyeli bar.
«Putinge resmiy şekilde muracaat etip, olarnı «vatanğa» almağa rica etkenler. Vışinskiyniñ soyadını Minskte ne rusiyeliler, ne de olarnıñ Donetsk ve Lugansk vilâyetleriniñ işğal altındaki rayonlarnıñ qoqlaları aytqan edi», – dedi Geraşçenko.
Devlet hainliginden şübheli sayılğan «RİA Novosti-Ukraina» reberi Kirill Vışinskiyniñ bildirgenine köre, onı ukrainalı siyasiy mabüslerge deñiştirüv meraqlandırmay. Bugün Vışinskiyniñ davası boyunca mahkemege Kyivge Rusiyeniñ insan aqları vekâletlisi Tatyana Moskalkova keldi.
Ukraina Tış işler nazirliginiñ malümatına köre, Rusiye 70 ukrainalını qanunsız şekilde tuta. Olarnıñ arasına 2018 senesi noyabrniñ soñunda Qırım yalısında Rusiye tarafından zapt etilgen 24 ukrainalı arbiy kirmey.
