Rusiyede mahküm etilgen Qırımdaki «Hizb ut-Tahrir davasınıñ» mabüsleri Teymur ve Uzeir Abdullayevlerniñ anası Dilâra Abdullayeva iyülniñ 29-nda Ukraina prezidentiniñ ofisi ögünde ekinci bir kişilik narazılıq aktsiyasını keçirdi. Bunı Qırım.Aqiqat mühbiri haber etti.
Dilâra Abdullayevanıñ bir kişilik piketi saat 11-den saat 2-gece devam etti.
«Bugün ekinci kere Prezident ofisi ögünde bir kişilik piket keçirdim, anda üç saat turdım. Yanıma Anton Körineviç keldi, mennen laf etti, oğullarım aqqında aytıp berdim, siyasiy mabüslernin azat etilmesi içün neler yapılğanı aqqında soradım. Yarın kene kelecegim», – dedi o.
Rusiyede mahküm etilgen Qırımdaki «Hizb ut-Tahrir davasınıñ» mabüsleri Teymurve Uzeir Abdullayevlerniñ anası Dilâra Abdullayeva iyülniñ 28-nde Ukraina prezidentiniñ ofisi ögünde başlatqan bir kişilik narazılıq aktsiyasını devam etmege niyetlene.
Rostov-na-Donu Cenübiy okrugınıñ arbiy mahkemesi Aqmescitteki «Hizb ut-Tahrir davası» mabüsleriniñ ükmüni 2019 senesi iyün ayında çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
