«Paytahtnıñ Peçersk rayonında 10 yaralanğan kişi bar. Ekisi hastahanege alındı. Bir yaralanğan insan hastahanede qala, ekincisi – 16 yaşında qız hastahaneden endi yiberildi», – dep ayttı o.
Klıçko bildirgenine köre, yaralanğan diger insanlarğa o yerde yardım kösterildi. Qurtarıcılar yıqılğan binanıñ viranelerini toplamağa devam ete.
Kyiv şeer arbiy memuriyeti yaralanğan 10 kişi akqında bildirdi, amma eki insan hastahanede qala.
Saba Rusiye ordusı işğal etilgen Qırımdan Kyivge eki ballistik raketanen ücüm etti. Ukrayına Silâlı quvetleriniñ malümatına köre, olarnı urıp tüşürgenler. Soñki 5 künde Rusiye Kyivge üçünci kere ücüm etti. Yerli akimiyetniñ malümatına köre, Peçersk rayonında raketa ücümi neticesinde yaşalmağan bina zarar kördi, Solomenskıy rayonında çoq qatlı ev zarar kördi. Dniprovskıy ve Ğolosiyıvskıy rayonlarında parçalar tüşti.
Ukrayına Medeniyet nazirligi bildirgenine köre, Rusiye raketasınıñ parçaları Boyçuk Ameliy sanat ve dizayn akademiyası korpusınıñ merkeziy qısmını bozdı. Sport salonı, kongress hall ve sergi merkezi yoq etildi. Akademiya laboratoriyasınıñ müdiresi yaralandı.
Moskva, isbat ve şaatlıqlarğa baqmadan, tam cenk başlağanından berli Ukrayınada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
