Rusiye ordusı Kyivge qarşı 31 raketa uçurdı, 21-ini Ukrayına ava mudafaa sistemasınıñ quvetleri tüşürdi, dep bildirdi Ukrayına paytahtınıñ yolbaşçısı Vitaliy Klıçko «Kyiv» telekanalınıñ yayınında.
«Arbiylerniñ malümatına köre, Kyivge 31 raketa kete edi, 21-i tüşürildi, kritik infrastrukturanıñ obyektlerine bir qaç raketa tüşti, şeerniñ bir qısmı elektriksiz qaldı. Suv yoq. «Kyivvodokanal» ve «Kyivenerğo» müessiseleri suv ve elektrik berilüvini ğayrıdan tiklemek içün çalışa», – dep tarif etti o.
Klıçko, bugün aqşam suv ve elektrik berilecek, dep ümüt ete.
«Bunıñ içün çalışamız. Amma tam vaqıt aytıp olamaymız. Bugün aqşam elektrik ve suv teminlevini ğayrıdan tiklemek içün elimizden kelgenini yapamız», – dep qoştı o.
Bazı Ukrayına regionlarında ışıq yoq. Ukrayına arbiyleriniñ malümatına köre, umumen noyabrniñ 23-nde Ukrayına arbiyleri 70 Rusiye raketasından 51-ini tüşürdi.
Ücüm neticesinde Rivne, Cenübiy Ukrayına ve Hmelnıtsk atom elektrostantsiyası generatsiyasız çalışa.
Rusiyeniñ Ukrayınağa qarşı büyük darbesi Moldovanı da ışıqsız qaldırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
