Salı künü, dekabrniñ 24-nde, Kyivdeki Rusiye elçihanesi ögünde faaller «Putinniñ Qırımda hırsızlanğan insanlar aqqında dünya masalları» adlı aktsiyasını keçirdi.
Qırım.Aqiqat mühbiriniñ bildirgenine köre, bu, «KrımSOS» cemaat teşebbüsiniñ faalleri Rusiyeden işğal etilgen Qırımda hırsızlanğan insanlarnıñ davalarını taqip etmesini talap etken 42-nci aktsiyası ola.
«Rusiye ve hususan Rusiye prezidenti Vladimir Putin Qırım işğalinden soñ problem ve insan aqları bozuvlarınıñ sayısı artqanını açıq-açıq aytmaycağına diqqatıñıznı celp etmege ve bunı hatırlatmağa ister edik. Rusiye vekilleri halqara meydançıqlarda çıqışta bulunğanda bu yahşı körüne. Olar masal ayta, alternatik kerçek aqqında tarif ete», – dep ayttı aktsiya aqqında «KrımSOS» cemaat teşkilâtınıñ koordinatorlarından biri Denis Savçenko.
Aktsiya vaqtında Rusiye prezidenti Vladimir Putin maskasını taqqan adam yılbaş naratı yanında oturıp, diger memleketlerniñ vekillerine Qırım aqqında yalanlar şeklinde bahşışlar bere edi.
Savçenkonıñ bildirgenine köre, bu aktsiya işğal etilgen Qırımda ğayıp olğan eki qırımtatarı Arlen Terehov ve Ruslan Ganiyevge bağışladılar.
Kyivdeki Rusiye elçihanesiniñ vekilleri faallerniñ yanına çıqmadı.
Qırım insan aqları bağ gruppasınıñ koordinatorı Abdureşit Cepparov, Qırımda Rusiye quvetçileri 2015 senesi dekabrniñ 15-nde ğayıp olğan Keriç sakinleri Ruslan Ganiyev ve Arlen Terehovnı tapmaq içün bir şey yapmay, dep aytqan edi.
Faallerniñ malümatına köre, Rusiyeniñ Qırım işğali başlağanınen 43 qırımlı ğayıp oldı, 15-i alâ daa tapılmadı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
