Link açıqlığı

Saatnıñ esas haberi

«Zaman işkencesi»: Kyivdeki Rusiye elçihanesi ögünde Qırımda hırsızlanğan insanlarğa qol tutuv aktsiyası keçirildi (+video)


Rusiyeniñ Kyiv elçihanesi ögünde aktsiya, arhiv fotoresimi
Rusiyeniñ Kyiv elçihanesi ögünde aktsiya, arhiv fotoresimi

KrımSOS malümatına köre, 2014 senesinden berli Qırımda 44 insan hırsızlandı

Cuma künü, iyünniñ 25-nde, KrımSOS teşkilâtınıñ falleri Kyivde Rusiye elçihanesi ögünde Qırımda hırsızlanğan insanlarğa qol tutmaq maqsadınen «Zaman işkencesi» adlı aktsiyanı ötkerdi.

«İyünniñ 26-nda dünya işkence qurbanlarına qol tutuv kününi qayd ete. Aktsiyamız bu kün munasebetinen keçirile, çünki Qırımda hırsızlanğan bir çoq insan işkencege oğratılğan edi», – dep bildirdi teşkilât.

Toplaşqanlar qırımtatar faali Reşat Ametov, Qırımda hırsızlanğan ilk kişi, qorqunç işkencelerden soñ öldürildi, dep hatırlattı.

«Bizim fikirimizce, işğal etilgen Qırımda hırsızlanğan ve alâ daa bir haber alınamağanlarnıñ qorantaları da azaplı işkencelerge oğratıla. Olarnıñ acısı maneviy. Bu insanlar sualleriniñ cevabını yıllarnen alamay: yaqınları qayda ğayıp oldı, sağlarmı, olarğa ne oldı», – dep qayd ete aktsiya teşkilâtçıları.

KrımSOS malümatına köre, 2014 senesinden berli Qırımda 44 insan hırsızlandı. 19-ı sağ tapıldı, üçü apiste tapıldı, bir kişi ekstraditsiya etildi, altı insan ölü tapıldı. 15-inden alâ daa bir haber yoq.

Uktaina Tış işler nazirligi dünya toplulığını işğal etilgen Qırım ve Donbas topraqlarında hırsızlanğan ve ğayıp olğan insanlarğa diqqat ayırmasına çağırdı.

Qırım ilhaqından soñ yarımadada insanlar, hususan qırımtatarlar, sıq-sıq qaçırılmağa başladı. Rusiye Taqiqat komitetiniñ Qırım idaresi, «yarımadada qırımtatarlarnıñ kütleviy ğayıp olması» qayd etilmey, dep israr ete.

Evel, ğayıp olğan ve taqdirleri aqqında alâ daa bir şey belli olmağan insanlarnıñ cevli yayınlanğan edi. Bu Valeriy Vaşçuk, İvan Bondarets, Vasiliy Çernış, Timur Şaymardanov, Seyran Zinedinov, İslâm Cepparov, Cevdet İslâmov, Eskender Apselâmov, Fedor Köstenko, Muhtar Arislanov, Arlen Terehov, Ruslan Ganiyev, Arsen Aliyev, Eskender İbraimov i Ervin İbragimov.

Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep israr etken edi.

XS
SM
MD
LG