Noyabrniñ 12-nde Kyivde keçirilgen VI çağırılış Qırımtatar Milliy Qurultayı delegatlarınıñ konferentsiyasında Qırımnıñ Rusiye akimiyeti ile işbirligi yapqanlarnı Qırımtatar Milliy Meclisi erkânından çıqarmağa teklif etildi. Bu aqta qırımtatarlarnıñ lideri Mustafa Cemilev tarif etti.
Cemilev, adlarnı aytmayıp, Qırımtatar Milliy Meclisinden çıqarılacaq namzetlerniñ sayısını aydınlatmadı, dep bildire Qırım.Aqiqat mühbiri.
«Bazı delegatlar halqına ve devletine hainlik yapqan Meclis azalarınıñ çıqarılmasını rey bermege talap eteler. Olarnıñ yerine yañı azalarnı saylamağa teklif etile. Qurultaynıñ diger delegatları, Meclis erkânındaki satqınlarğa qulaq asmamaq mümkün, dep tüşüne. Meclis azalarını quvmaq içün delegatlarnıñ yeterli sayıda olması kerek. Bugün tahminen 100 delegatımız toplaştı – kvorum içün yeterli degil. Menim fikirimce, munaqaşadan soñ bu meseleni çezermiz», – dep bildirdi Cemilev.
Onıñ qayd etkenine köre, Qurultay ve Meclis işğal etilgen Qırımda «tek qırımtatarlarnı degil, Ukrainanı satmağan yarımada sakinleriniñ» yekâne qanuniy temsilci organları ola.
«Delegatlar tek qırımtatarlar ögünde degil, Ukrainağa sadıq qalğan bütün qırımlılar ögünde mesüliyet taşıy», – dep qayd etti Cemilev.
Kyivde VI çağırılış Qırımtatar Milliy Qurultayı delegatlarınıñ konferentsiyası keçirile. Tedbirge 100-den ziyade delegat keldi.
2016 senesi Rusiye kontrolindeki Qırım Yuqarı mahkemesi, artından ise Rusiye Yuqarı mahkemesi qırımtatarlarnıñ temsilci organı – Qırımtatar Milliy Meclisini – yasaq etmege qarar aldı. Onı Rusiye topraq bütünligini bozmağa tırışqanında qabaatlap, ekstremist teşkilâtı olaraq tanıdılar.
2017 senesi Ukraina BM Halqara mahkemesinde Rusiyege qarşı dava açtırıp, onı Ukrainada terrorizmnm maliye etip qoltutqanı içün, em de Ukrainağa qarşı istilâ çerçivesinde ayırım yapqanı içün mesülietke çekilmesini talap etken edi. Vaziyetni köz ögüne alğan mahkeme 2017 senesi aprelniñ 19-nda Ukrainanıñ talabınen Rusiyege qarşı vaqtınca tedbir almağa qarar qabul etti.
