Ukraina jurnalistleri milliy birligi (UJMB) apiske alınğan qırımlı vatandaş jurnalistleri ve qorantaları aqqında fotoresimler sergisiniñ açılışını ilân ete. Bu aqta teşkilâtnıñ matbuat hızmeti haber ete.
Tedbirde 40 fotoresim taqdim etilecek. Çoqusında – vatandaş jurnalistleriniñ aileleri: ömür arqadaşları ve balaları. Sergi dekabrniñ 28-nde saat 11:00-da Ukraina jurnalistleri milliy birliginiñ konferents-zalında açılacaq.
«Fotoresimlerde körecek insanlarıñız apiste buluna, lâkin olar qorantaları yanında olğanını, bizler ise olarnıñ azatlıqqa çıqacaq kününi yaqınlaştırmaq içün ve omuzlarımıznı daima is etsin dep elimizden kelgenini yapqanımıznı bileler», – dep bildirdi Ukraina jurnalistleri milliy birliginiñ yolbaşçısı Serğiy Tomilenko.
Fotoserginiñ açılışı munasebetinen siyasiy mabüslerniñ apayları spiker olacaq. Qırım.Aqiqat müellifi Mıkola Semena, Qırım.Aqiqat leyhasınıñ reberi Volodımır Prıtula, Ukraina prezidentiniñ Qırım Muhtar Cumhuriyetindeki daimi vekili Anton Korınevıç ve digerleri iştirak etecek.
Ukraina Yuqarı Radasında Donetsk ve Lugansk vilâyetleriniñ işğal etilgen topraqlarında ve Rusiye işğal etken Qırımda ğayıp olğan Ukraina vatandaşları aqqında fotoresimler sergisi açıldı.
Ukraina prezidenti Volodımır Zelenskıynıñ Qırım kütleviy haber vastalarına bildirgenine köre, Kreml ukrainalı siyasiy mabüslerni, hususan qırımlılarnıñ Rusiye apsinden azat etüv esnasını «aqsata», dep aytqan edi.
Noyabrniñ 26-nda Ukraina prezidenti Volodımır Zelenskıy Kyiv Türkiye prezidenti Recep Tayyip Erdoğan vastasınen Vladimir Putinge Ukraina azat etilüvini beklegen ukrainalı siyasiy mabüslerniñ cedvelini berdi, dep bildirdi. Kreml Zelenskıynıñ aytqanlarını tefsir etmedi.
Qırımnıñ Rusiye yolbaşçısı Sergey Aksenov Qırımda siyasiy mabüsler yoq, dep bildire.
