Yanvar 7-sinde Ukraina akimiyeti, Qara deñizde Rusiye ukrain deñizcilerini zapt etkeninden sebep İnsan aqları boyunca Avropa mahkemesinde (YESPÇ) dava açtı. Bu aqta Facebookta Ukraina Adliye Nazirligini başınıñ muavini ve Avropa mahkemesi boyunca vekâletli İvan Lişçina bildirdi.
“Akimiyet, mahkeme, 2018 senesi noyabr 25-inde Rusiye ukrain gemilerge qanunsız zapt etüv, yaralav ve ücümi vaqtında 24 ukrain deñizciniñ aqlarını bozğanını, serbestlik sıñırlayıcı müessiselerde tutılmasını ve cinaiy qabbatlavnı qanunsız qabul etmesini talap ete. Ukraina akimiyeti, böyleliknen Konventsiyanıñ 38, 2, 3, 5 ve 6-ncı maddesi bozulğanını qayd ete”, - dep yazdı ukrain akimiyetniñ temsilcisi.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Kreml kontrolindeki Aqmescitniñ Kiyev rayon mahkemesi 24 Ukraina deñizcisini 2019 senesi yanvarniñ 25-ne qadar apiske aldı. Keriç hastahanesinde bulunğan daa üç deñizcini Keriç şeer mahkemesi apiske aldı. Olar da 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile.
Qırım Muhtar Cumhuriyetiniñ prokuraturası Rusiyeniñ FSBsi tarafından tutılğan Ukraina deñizcilerini cenk esiri olaraq tanıdı.
Rusiyeniñ Keriç boğazında yapqanlarını bir sıra Avropa memleketi ve AQŞ tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
