Aprelniñ 4-ünde Kyivde Rusiye elçiligi yanında Qırımda 14 yılğa mahküm etilgen Volodımır Dudkanıñ qardaşı, Petro Dudka, bir kişilik piketni keçirdi, dep bildire Qırım.Aqiqat mühbiri.
“Bugün menim qardaşım Volodımır Dudka ve onıñ dostu Aleksey Bessarabov mahküm etildi. Olar qabaatını tanımadı. Bu dava, Volodâ ve Aleksey işğalci akimiyetnen işbirlik yapmağa istemegeni içün uydurılğan sebeplernen yapıldı. Tamam bunıñ içün Rusiye akimiyeti olarğa büyük apis müddetini mahküm etip, olduqça cezalamağa qarar bergen”, - aytıp berdi Petro Dudka.
Rusiye kontrolindeki Aqyar şeer mahkemesi «ukrain diversantları davasınıñ» mabüsleri Vladimir Dudka ve Aleksey Bessarabovnı devamlı apis cezalarına üküm etti. Ekisi de 14 yılğa üküm etildi.
Aprelniñ 2-nde Aqyar şeer mahkemesiniñ oturışuvında qabaatlayıcı taraf «ukrain diversantları davasınıñ» mabüsi Vladimir Dudka içün 15 yıl apis cezası berilmesini istedi. 4-üni apishanede keçirecek, qalğan – 11 yılnı ise sert rejimli koloniyada. Davanıñ diger mabüsi – Aleksey Bessarabovnı – Rusiye prokuraturası 14 yıl ve 10 ayğa üküm etmege rica etti. Olardan 4 yılnı apishanede, qalğan 10 yıl ve 10 aynı sert rejimli koloniyada keçirmeli.
2016 senesi noyabrniñ 9-nda Aqyarda «Nomos» Qırım analitik merkeziniñ hadimleri Dmitriy Ştıblikov, Aleksey Bessarabov ve yaqın dostu Vladimir Dudka tutulğan edi. Üçü de Ukraina istihbaratınıñ isteginen Qırımda diversiya azırlağanında qabaatlandı.
2017 senesi noyabrniñ 16-nda Aqyar şeer mahkemesi Ştıblikovnı 5 yıl sert rejimli koloniyada qalmasına ve 200 biñ ruble (95 biñ ğrıvnâ) para cezasına üküm etti.
Ukraina telükesizlik hızmetiniñ bildirgenine köre, Qırımda tutulğan Ukraina vatandaşları SBU hadimleri ya da hızmetçileri degil.
