Ukraina Tış işler nazirligi OSCE Parlament assambleyasınıñ Qırımnıñ Rusiye ilhaqını ve Donetsk ve Lugansk vilâyetleriniñ ayrı rayonlarınıñ işğalini takbih etken acele qararınıñ qabul etilmesini alğışladı. Bu aqta Azatlıq Radiosı haber ete.
«Bu qararnıñ qabul etilüvi halqara toplulıqnıñ Rusiyeniñ Ukrainağa qarşı istilâsını takbih etkeninde bir olğanını daa bir kere isbatladı. Asker sayısınıñ arttırıluvı Avropa havfsızlığı içün telükeli ola. OSCE Parlament assambleyası Rusiyeni qanunsız Qırım işğalini toqtatmasına, ordu, silâ, arbiy tehnikasını işğal altındaki yarımadadan çıqarmasına ve askerlikke aluv kampaniyalarını toqtatmasına çağırdı. Bundan ğayrı, Assambleya Rusiyeni Qara deñizde, Azaq deñizinde ve Keriç boğazında gemilerniñ serbest keçüv sıñırlavlarını lâğu etmesine çağırdı», – dep aytıla Ukraina Tış işler nazirliginiñ saytında.
Tış işler naziri Dmıtro Kuleba «Rusiyeniñ Ukrainağa qarşı silâlı istilâsı neticesinde Avropa telükesizliginiñ buhranını yoq etüv halqara ğayretlerine qoşulğan müim bir isse» ola, dep ayttı.
İyülniñ 6-nda OSCE Parlament assambleyası Ukraina teşebbüsinen acele qarar aldı. Qarar Rusiyeniñ halqara uquqqa zıt bir şekilde Keriç boğazı ve Azaq deñizini blok etmek ıntıluvlarını takbih ete.
Rusiye, bu qarar qabul etilse, OSCE Parlament assambleyasını terk eter dep, oturışuvdan ketti.
OSCE Parlament assambleyası dünyada nefret ve zorbalıq artqanını takbih etken ABD qararını da qabul etti.
Vesiqada Beyazrusiyedeki adise-vaqialar ayrıca qayd etildi.
Felemenkniñ teşebbüsinen Aleksandr Lukaşenko rejiminiñ cinayetleri takbih etilgen bir qarar qabul etildi.
