Cumağa keçer gecesi Rusiye Ukrayinağa dron ve raketalarnen ücüm etti. Kyiv ve Kyiv vilâyeti, Odesa şeeri darbelerge oğradılar. Qurbanlar bar.
Ukrayinanıñ paytahtında uçucısız darbesi neticesinde çoq qatlı evniñ 7-10 qatları seviyesinde yanğın çıqtı, – dep yaza şeer yolbaşçısı Vitaliy Klıçko Telegramda. Daa bir dron 25 qatlı evde 4 qat seviyesinde ücüm etti.
Kyivniñ Podol rayonında dron parçaları yaşalmağan inşaatqa zarar ketirdi, bir insan Solomenskıy rayonında uçucısız darbesinden soñ zarar kördi.
Soñra belli olğanına köre, Kyivke qarşı darbe neticesinde 14 yaşında oğlançıq elâk oldı, daa üç kişi yaralandı, biriniñ alı ağır.
Kyiv vilâyetinde üç rayon ücümge oğradı, dep bildire Ukrayina devlet fevqulâde vaziyetler hızmeti, anbar, mustaqil evler ve terek işlegen müessise zarar kördiler.
Rusiye arbiyleri Odesa ve Odesa vilâyetine daa bir darbe endirdi. Ukrayina devlet fevqulâde vaziyetler hızmeti bildirgenine köre, poçta terminalınıñ binası ve mustaqil ev zarar kördiler. Bir qadın elâk oldı, bir kişi daa yaralandı.
Zaporijjâda sentâbrniñ 25-nde saba Rusiye ücümi neticesinde tibbiy merkez yandı, acele yardım maşinaları zarar kördi, bir kişi yaralandı.
Rusiye Mudafaa nazirligi bildirgenine köre, Kyiv vilâyetinde uçucısız anbarı zarar kördi, Odesa vilâyetinde ise eki logistik merkez ve Reni limanı zarar kördiler.
Ukrayina Ava quvetleriniñ malümatına köre, gece Rusiye 295 darbe dronını qullandı, 267-si tüşürildi. Bu raqamlarnı tasdıqlaycaq mustaqil bir menba yoq.