Kyivniñ Şevçenkivskıy rayon mahkemesi Ukraina telükesizlik hızmetini qırımtatar iş adamı Lenur İslâmovğa qarşı cinaiy tahqiqat başlatmağa mecbur etti. Bu aqta Qırım.Aqiqat elde etken mahkeme qararınıñ kopiyasında aytıla.
Vesiqağa binaen, mahkeme kyivli advokat Valentin Rıbinniñ şikâyetinden soñ böyle qarar aldı. Şikâyet arizasında qayd etilgenine köre, o, yanvarniñ 28-nde UTH-ne muracaat etip, qırımtatar iş adamı Lenur İslâmovğa qarşı devlet hainligi ve separatizm maddesine istinaden dava açmağa rica etti.
Rıbinniñ vesiqada qayd etkenine köre, 2014 senesi aprelniñ 4-nden mayısnıñ 28-ne qadar İslâmov işğal altındaki Qırımnıñ Rusiye ükümetinde baş nazir muavini vazifesinde bulunğan edi. Advokat, İslâmov «silâlı zıddiyet vaqtında duşmannıñ tarafına keçti» ve «Ukraina devlet sıñırları ve topraq bütünligine» zarar ketirdi, dep bildire.
Ukraina Ceza-protsessual kodeksine binaen, bu ariza esasında Ukraina telükesizlik hızmeti bir kün içinde cinaiy tahqiqat başlatmaq kerek edi, lâkin bu olmadı. Şu sebepten Rıbin tahqiqatçınıñ areketsizligini şikâyet etti, mahkeme onı qanaatlendirdi. Fevralniñ 11-nde qabul etilgen Kyivdeki Şevçenkivskıy rayon mahkemesiniñ qararında aytılğanına köre, UTH, advokat bildirgen malümatnı acele sürette Mahkemeden evelki tahqiqatlar cedveline kirsetmeli.
Advokat Valentin Rıbin Kyivde devlet hainligi ve separatizmde qabaatlanıp mahküm etilgen Qırımnıñ Rusiye sabıq sağlıq naziri Petr Mihalçevskiyniñ imayecisi ola. Lenur İslâmov bu esnasta qabaatlayıcı tarafnıñ şaatı ola. Advokatnıñ aytqanına köre, o, mezkür arizanı berip, al-azırda «Ukrainada bunıñ kibi davalarda adliye istekke köre qullanıla», dep köstermege istey.
Ukraina Telükesizlik hızmeti bunıñnen bağlı açıq beyanatta şimdilik bulunmadı. UTH matbuat hızmetiniñ Qırım.Aqiqat mühbirine bildirgenine köre, olar Şevçenkovskiy rayon mahkemesiniñ qararı aqqında bir şey bilmey. Lenur İslâmov Kyivdeki Şevçenkivskıy rayon mahkemesiniñ qararını açıq sürette izaatlamadı, Qırım.Aqiqat mühbirine telefonda cevap bermey.
Lenur İslâmov – qırımtatar iş adamı ve siyasetçi, ATR telekanalınıñ saibi, «Qırımnıñ vatandaş qamaçavı» aktsiyasınıñ teşkilâtçısı, «Asker» cemaat birleşmesiniñ yolbaşçısıdır. 2014 senesi aprelniñ 4-nden mayısnıñ 28-ne qadar işğal etilgen Qırımnıñ Rusiye ükümetinde baş nazir muavini olğan edi. Onı anda Qırımtatar Milliy Meclisi vaqtınca yollağan edi.
Petr Mihalçevskiy Qırımnıñ Rusiye ükümetinde 2014 senesi fevralniñ 27-nden iyünniñ 10-na qadar sağlıq naziri olıp çalıştı. Qırım Muhtar Cumhuriyetiniñ prokuraturası, o, Ukraina Ceza kodeksiniñ 110-uncı maddesi (topraq bütünligine zarar ketirüv) ve 111 maddesindeki (devlet hainligi) cinayet işlerdi, dep bildire.
2018 senesi yanvarniñ 8-nden berli Petr Mihalçevskiy nezaret altında buluna. İyün ayında sabıq nazirniñ davasında tahqiqat yekünlengen edi, şimdi onı Kyivniñ Dniprovskıy rayon mahkemesi baqmaqta.
