Kyivdeki Qabarcılıqqa qarşı yüksek mahkemesi, Qabarcılıq ile küreş mahsus prokuraturasınıñ (SAP) ve Qabarcılıq ile küreş milliy bürosınıñ (NABU) Ukraina prezidentiniñ Qırım Muhtar Cumhuriyetindeki sabıq daimiy vekiliniñ sıñırlav tedbirini belgilemek muracaatlarını red etti.
Bu aqta mahkemeniñ Facebooktaki resmiy saifesinde haber etile.
«Qabaatlav tarafı şübhelini apiske almağa rica etti. Şübheli malümat bergen soñ, prokurorlar muracaatnı deñiştirip, onı gece vaqtına ev apsine almağa rica etti», – dep aytıla haberde.
Qabarcılıqqa qarşı yüksek mahkemesiniñ malümatına köre, mahkemeniñ malümatı yanvarniñ 29-nda qararnıñ tolu metni seslendirilgen soñ aydınlatılacaq.
Mahkeme haberinde şübheliniñ adı aytılmay, faqat Qırım.Aqiqat laf Ukraina prezidentiniñ Qırım Muhtar Cumhuriyetindeki sabıq daimiy vekili Boris Babin aqqında ketkenini bildi.
Babinniñ oturışuvdan soñ Facebookta yazğanına köre, oturışuvğa onıñ içün kefil olmağa azır olğan çoq dostu keldi.
«Elbette, bugün Qabarcılıqqa qarşı yüksek mahkemesiniñ NABU ve SAPnıñ sıñırlav tedbirimnen bağlı muracaatlarını red etmesi küçük bir protsessual ğalebe ola. Amma uzun yol küçük adımdan başlay», – dep yazdı Babin.
Onıñ daa evel bildirgenine köre, SAP ve NABU oña Ukraina Ceza kodeksiniñ 191-inci maddesine istinaden (vazifesinden tış areketler neticesinde mal-mülkni israf ya da elde etüv) şübheli sayılğanına dair qarar bermege tırışqan ediler. Bunıñ sebebi Avropa İnsan aqları mahkemesi işlerinden ükümet vekâletlisi vazifesindeki faaliyeti olğan eken.
Boris Babin – halqara uquqçı, odesalı professor. 2017 senesinden 2018 senesine qadar Ukraina prezidentiniñ Qırım Muhtar Cumhuriyetindeki daimiy vekili edi.
