Kyiv istinaf mahkemesi yanvarniñ 30-nda Qırım Muhtar Cumhuriyetiniñ sabıq deputatı Vasiliy Ganışnı devlet hainliginde qabaatlı tanığan evelki instantsiya mahkemesiniñ ükmüni deñiştirmedi. Bu aqta Qırım Muhtar Cumhuriyetiniñ prokuraturası haber ete.
Qayd etilgenine köre, o, 12 yılğa üküm etildi.
Daa evel Ganışnıñ advokatı Andrey Rudenko, onı Ukraina ve Rusiye arasında tutulğan insanlarnı deñişim cedveline kirsetmege teklif etilgen edi, dep bildirdi.
Daa soñra Ukraina telükesizlik hızmetiniñ Qırım.Aqiqatqa bildirgenine köre, sabıq deputatnıñ deñişim cedveline kirsetilgeni aqqında malümatnı berip olamaylar.
2018 senesi noyabrniñ 19-nda Kyivniñ Dnipro rayon mahkemesi Qırım Yuqarı Şurasınıñ sabıq deputatı Vasiliy Ganışnı devlet hainliginde qabaatlı tanıp, mal-mülkini almadan 12 yılğa üküm etti. Mahküm etilgen kişi 5389 ğrıvnâ mahkeme masraflarına ödemeli. Mahkeme qararı işke tüşürilgenine qadar Ganış ev apsinde qalmalı. İstinaf mahkemesi qarar çıqarğanına qadar bu sıñırlav tedbiri devam etecek.
