Mayısnıñ 16-na keçer gecesi Kyiv daa bir ücümge oğradı – lâkin Ukrayına paytahtında duşmannıñ çoqusı silâsı yoq etildi. Bu aqta Kyiv şeer arbiy memuriyetiniñ matbuat hızmeti bildirdi.
İlk malümatqa köre, parçalar Şevçenkivskıy, Svâtoşinskıy, Obolonskıy, Darnıtskıy ve Solomenskıy rayonlarında tüşti. Soñkisinde kimse yaşamağan bina ve bir qaç maşina yandı. Qalğanlarında – parçalar maşinalarğa, azbarlarğa ya da orman-park alanlarına tüşti.
Kyiv şeer yolbaşçısı Vitaliy Klıçko Solomenskıy rayonında yaralanğan üç kişi aqqında bildirdi, amma şeerniñ arbiy memuriyeti yaralanğanlar aqqında malümat yoq, dep haber etti. Matbuat hızmeti qayd etkenine köre, duşman birden farqlı yönelişlerge ücüm etti, dron, qanatlı raketa ve ballistik çeşitli raketalarnı qullandı.
Büyük Britaniya istihbaratı haber etkenine köre, Rusiye komandanları pek paalı qanatlı raketalar Ukrayınağa qarşı cenkte nasıl qullanılacaq añlamay.
«Rusiye bu silânıñ qullanluvını vaqtınca toqtatqandır, çünki yedeklerini ğayrıdan tiklemege istedi», – dep aytıldı haberde.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
