Ukrayına fevqulâde vaziyetler devlet hızmeti bildirgenine köre, paytahtnıñ Solomenskıy rayonında «şahed» parçalarınıñ tüşmesi neticesinde mesken evniñ 24-ünci qatında yanğın çıqtı. Üç dairede 24-26-ncı qatlarda divarlar yıqıldı, daa üç qatta camlar qırıldı. İlk malümatqa köre, eki insan yaralandı.
Darnıtskıy rayonında parçalarnıñ tüşmesi neticesinde qurulayatqan eki qatlı mesken evniñ ekinci qatında bir odada yanğın çıqtı. Yanğın söndürildi.
Bundan ğayrı, arbiy-vatandaş memuriyeti bildirgenine köre, Ğolosiyıvskıy rayonında çoq qatlı binağa dron parçaları tüşti – yaralanğanlar yoq.
Rusiye arbiyleri, top, toplu ateş raket sistemaları, dron ve raketalarnı qullanıp, Ukrayina şeerlerine muntazam sürette ateş aça. Delil ve şaatlıqlarğa baqmadan, Moskva Ukrayinada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
