Kyivniñ şeer yolbaşçısı Vitaliy Klıçko paytaht Rusiye işğalci ordusından azat etilgen Hersonğa yardım yollamağa qarar berdi, dep bildirdi.
«Şeerge tehnika, malzeme, er şey kerek. İmkânlarımıznı baqıp, Hersonğa yollaycaqmız: 5 yolcu avtobusı, 4 yük maşinası (MAZ, Foton), çöplük taşıyıcısı, ekskavator, 2 acele yardım maşinası, 11 generator (2kVt ve 5kVt). Tibbiy donatma: 30 aqcigerni suniy avalandıruv cihazı, 30 nefes cihazı. Aş da yollaycaqmız – yağ, şeker ve yarma. Hersonğa qalın yorğan, urba da ketecek. Qurucılıq malzemeleri, aletler», – dep tarif etti Klıçko.
Onıñ qayd etkenine köre, o, Kyiv şurasınıñ Hersonğa 50 million ğrıvnâ berilüvini baqmasını teklif etecek.
Herson ve vilâyetniñ bir qısmını Rusiye arbiyleri martnıñ başında işğal etti. Noyabrniñ 11-nde Ukrayına Mudafaa nazirligi Herson Ukrayına ordusınıñ kontroline qayta, dep bildirdi. Şeerniñ merkezinde Ukrayına bayrağı köterildi. Ukrayına arbiyleriniñ malümatına köre, Herson vilâyetinde Dnipronıñ sağ tarafında soñki afta içinde 4,5 biñ metr kârede 179 mesken yer işğalden azat etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
