Fevralniñ 26-sında LiberateCrimea halqara areketiniñ faalleri Kyivde Rusiye elçiligi yanında Qırımdaki tecavuzğa qarşı «#LiberateCrimea #CrimeaIsUkraine» adlı aktsiyasını keçirecek. Bu tedbirniñ Facebook saifesinde bildirile.
"Er kesni fevralniñ 26-sında "Qırımnıñ Rusiye işğaline qarşı tirenüv künü"nde #LiberateCrimea #CrimeaIsUkraine bütündünya aktsiyasına qoşulmağa çağıramız. Aktsiyanıñ esas maqsadı - içtimaiyetiniñ diqqatını Rusiyeniñ Ukrainadaki tecavuzına yöneltmek, halqara diplomatiyağa ve halqara topluluqqa Kremlniñ geosiyasiy cinayetini hatırlatmaqtır", - denile tedbirniñ ilânında.
Ukrainada salı künü, fevralniñ 26-nda, «Qırımnıñ Rusiye işğaline qarşı tirenüv künü» qayd etildi. 2014 senesi şu künü Qırım Muhtar Cumhuriyetiniñ Yuqarı Şurası ögünde Ukraina topraq bütünligine qoltutuv mitingi olıp keçken edi. Miting iştirakçilerine qarşı Rusiye tarafdarları, hususan «Rus birligi» firqası çıqtı.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
