Rusiye ordusı sentâbrniñ 1-ne keçer gecesi Kyiv vilâyeti ve Ukrayina paytahtına ücüm etti, dep bildirdi yerli akimiyet. Kyiv ve vilâyetinde elâk olğan ve yaralanğan insanlar bar. Esas darbe demiryol deposı ve diger "Ukrzaliznıtsâ" obyektlerine oldı.
Kyiv vilâyetiniñ arbiy memuriyet yolbaşçısı Timur Tkaçenko raketa ve dronlarnıñ kütleviy ücümi aqqında haber etti: "Duşman kene vatandaş obyektlerine ve mesken evlerge ura".
Borıspilde ücüm neticesinde beş qatlı ev zarar kördi, maşinalar yandı. Evden 48 insan tahliye etildi. Vilâyetniñ arbiy memuriyet malümatına köre, sekiz kişi yaralandı, aralarında bir bala bar, olarğa tibbiy yardım kösterile.
Sentâbrnâñ 1-ne keçer gecesi Rusiye ballistik ücümi "Ukrzaliznıtsânıñ" demiryol deposı ve diger obyektlerine yapıldı – bu aqta taşıyıcınıñ idare reyeisi Öleksandr Pertsovskiy salı sabası bildirdi.
"Ballistik darbe 7 insannı öldürdi, 6-sı – hadimlerimiz. Yaralanğan bir işdeşimiz hastahanede – kerekli yardım kösterile. Onlarnen kişi sığınaqlarda qurtarıldı, olarğa özüne kelmege yardım etemiz", – dep yazdı o, Facebook saifesinde.
Pertsovskiy yıquvlar aqqında bildirdi, bir tseh yoq oldı. Eki yolda areket toqtatıldı.
"Al-azırda demiryol hadimleri aqibetlerni yoq etmek ve zarar körgen infrastrukturanı ğayrıdan tiklemek içün çalışa", – dep bildire "Ukrzaliznıtsânıñ" matbuat hızmeti.
Devlet fevqulâde vaziyetler hızmeti bildirgenine köre, Rusiye ücümi neticesinde Kyivde sekiz insan elâk oldı, üçü bala olğan beş kişi yaralandı. Yedi insan Darnıtsâda elâk oldı, bir kişi ağır alda hastahanede buluna. Daa bir insan Ğolosiyıvskıy rayonında elâk oldı. Solomenskıy rayonında uçucısız mesken evge tüşti, yanğıncılar erkekni ve qadınnı qurtardı.
Kyiv şeeriniñ arbiy memuriyeti paytahtqa yapılğan ücüm vaqtında elâk olğan üç ve yaralanğan beş kişi aqqında bildirdi. Kyiv vilâyetiniñ Borıspil şeerinde de elâk olğan ve yaralanğanlar bar.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.