KrımSOS cemaat teşkilâtınıñ koordinatorı Denis Savçenko qırımlı siyasiy mabüslerge bağışlanğan «Yerastı çıqmaz» adlı sanat obyektine ketirilgen zarar sebebinden Kyivdeki Şevçenkivskıy polis idaresine ariza berdi.
Mayısnıñ 14-nde teşkilâtnıñ resmiy saytında haber etilgenine köre, KrımSOS polisten Ukraina Ceza kodeksiniñ 194-ünci maddesiniñ 1-inci qısmına istinaden (Başqasınıñ mülkini yoq etüv ya da zarar ketirüv neticesinde büyük miqdarda zarar ketirüv) cinaiy dava açmasını rica ete.
«Sanat obyektinde resim yapqanlarnıñ qırımlı siyasiy mabüsler aqqında başqa bir fikir bildirmek maqsadı yoq edi, dep tüşünemiz. Bu birisiniñ aqılsızlığı edi. Amma yazuvlı şiarımıznı çıqarmağa tırışıp keskenler bunı siyasiy mabüsler ve sanat obyekti aqqında malümatımıznı gizlemek istedi, dep tüşünemiz», – dep qayd etti Denis Savçenko.
Hatırlatamız, mayısnıñ 13-nde «Kiyevavtodor» Kyivniñ Avropa meydanı yaqınlarında yerastı keçitte kimligi belli olmağan insanlar qırımlı siyasiy mabüslerge bağışlanğan sanat obyektinde küfür sözler, pentagramma, diniy nefretke yol açqan ibareler ve başqa şeyler yazdı, dep bildirdi.
Kyiv polisi mayısnıñ 13-nde qırımlı siyasiy mabüslerge bağışlanğan «Yerastı çıqmaz» adlı sanat obyektinde vandallarnıñ areketlerinen bağlı muracaat kelgenini Qırım.Aqiqatqa tasdıqladı. Faqat, olarnıñ aytqanına köre, cinaiy tahqiqat daa başlatılmadı.
Qayd etmek kerek ki, siyasiy mabüslerge bağışlanğan «Yerastı çıqmaz» adlı sanat obyekti bu yıl fevral ayında KrımSOS cemaat teşkilâtı ve ARTIF Tiflis platforması tarafından yapıldı.
Tutulğan şahıslar soñki sefer 2020 senesi aprelniñ 16-nda deñiştirildi: resmiy şekilde Ukraina ve «DNR» ve «LNR» reberleri iştirak etti. Rusiyege qol tutqan aydutlar 20 insannı azat etip, Kyivge teslim etti. İlk ve soñki sefer qırımlılar 2019 senesi azat etildi. O vaqıt Oleg Sentsov, Edem Bekirov ve Kremlniñ diger siyasiy mabüsleri azatlıqqa çıqtı. Qırım aq qorçalayıcı gruppasınıñ malümatına köre, 2020 senesi Qırımda siyasiy ya da diniy sebeplerden 24 insan üküm etildi.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
