Ukraina Tış işler nazirligi, «Qırım Muhtar Cumhuriyeti ve Aqyar şeeriniñ (Ukraina), em de Qara ve Azaq deñizleriniñ askeriyleştirilüv problemleri» qararınıñ yañı leyhası yılnıñ soñuna qadar Birleşken Milletler Baş Assambleyası tarafından qabul etilüvini talap etecek. Bu aqta Tış işler naziriniñ muavini Yeğor Bojok Twitterde haber etti.
«BMde elçi Volodımır Yelçenko ile beraber işğal etilgen Qırımnıñ Rusiye tarafından askeriyleştirilüvinen bağlı BM BA qarar leyhası mesleatlarını başlattıq. Bu yılnıñ soñuna qadar onıñ qabul etilüvini teminlemege planlaştıramız», – dep yazdı Bojok.
Ukraina Tış işler nazirliginiñ vekili bildirgenine köre, Qırımda 2019 senesi küzde 31,5 biñ Rusiye arbiyi, biñge yaqın tehnika, hususan tank, zırhlı maşina, küçlü top vastaları, aviatsiya ve flot bulunalar.
2018 senesi dekabrniñ 17-nde Qırım, Qara ve Azaq deñizleriniñ askeriyleştirilüvinen bağlı qabul etilgen BM Baş Assambleyasınıñ qararı Rusiyeni Qırımdan ordusını çıqarmasına çağırıp, Qara ve Azaq deñizlerinde arbiylerniñ bulunuvını takbih ete.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
