Ukraina Nazirler şurası Ukraina prezidenti Volodımır Zelenskıy tarafından Bağçasaraydaki «Hizb ut-Tahrir davasınıñ» eki mabüsi Seyran Saliyev ve Server Mustafayevge Levko Lukyanenko stipendiyasınıñ berilüvini tasdıqladı.
Böyle qarar martnıñ 24-nde Nazirler şurasınıñ toplaşuvında qabul etildi.
Stipendiya Saliyev ve Mustafayevniñ «Ukraina suvereniteti ve topraq bütünligini qorçalamaq içün» köstergen «cemaat ve siyasiy faaliyetleri» içün berildi. Stipendiya Rusiye apsinde qalğan müddet devamında ve azatlıqqa çıqqan soñ bir yıl devamında berilecektir.
Levko Lukyanenko devlet stipendiyaları – Rusiye tarafından qanunsız tutulğan Ukraina vatandaşlarınıñ aqları, azatlığı ve menfaatlarınıñ qorçalavını temin etmek maqsadınen 2018 senesinden itibaren berilgen mukâfattır.
Siyasiy mabüs tanılğan qırımlı Emir-Usein Kukuğa da Lukyanenko stipendiyası berilgen edi.
2019 senesi iyül ayında prezident Zelenskıy 11 ukrainalı siyasiy mabüske Lukyanenko stipendiyasını berdi.
Ukrainanıñ beşinci prezidenti Poroşenko Oleg Sentsov, Volodımır Baluh, Mıkola Semena ve Roman Suşçenkoğa Lukyanenko stipendiyasını bergen edi.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
