Ukrainananıñ Birleşüv Künü munasebeti ile Kyiv-Aqmescit arasında olğan virtual birlik zıncırına 40 573 adam qoşuldı.
Yanvarnıñ 22-nde virtual zıncır Aqmescit ve Kyivni birleştirdi. O vaqıt aktsiyada endi 40 181 biñ adam iştirak etti.
Zıncır yaratıluvı yanvarnıñ 21-nde başlandı. “Birlik zıncırı”na qoşulmaq içün içtimaiy ağlar vastası ile aktsiya saytında kerçekligini tasdıqlamaq kerek edi. Onlayn-zıncırnı, bir biriniñ artından Kiyevdeki Sofiya meydanından Aqmescitteki Taras Şevçenko parkına qadar 1058 kilometr uzunlığınen yolu boyunca haritada iştirakçilerniñ fotoresimleri yaratmak kerek edi.
Kün devamında virtual “Birlik zıncırına” Ukraina ombudsmeni Lüdmila Denisova ve yırcı Jamala qoşuldı.
Ukrainanıñ Birleşüv künü Qırımda. Bunıñ nasıl olğanını hatırlaymız (fotogalereya)
Zıncır timasaliy olaraq 5 kere Dniprodan keçti: Paton köpründe, Çerkası, Kremençuk, Dnipro ve Zaporijjâda.
Ukrainanıñ Maneviy birleşüv Künü er yıl, Ukraina Halq Cumhuriyeti (UHC) ile Ğarbiy Ukraina Halq Cumhuriyetiniñ (ĞUHC) 1919 senesi yanvarniñ 22-nde ğayrıdan bir ukrain devletine birlişmesi Aktı ilân etilgen kününde qayd etile.
2014 senesiniñ başında Qırım Rusiye tarafından işğal etilgen soñ bu bayram yarımadada qayd etilmey, lâkin Aqmescitte T.Şevçenko abidesi ögünde ukrain timsallerinen yaraştırılğan çeçekler peyda ola.
2017 senesi Qırımdan köçmege mecbur olğanlar ve diger faaller Kyivde «birleşüvniñ canlı zıncırını» yaptı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
