Ukraina prezidenti Petro Poroşenko Türkiye prezidenti Recep Tayyip Erdoğan ile telefonda laf etip, Rusiyeniñ Keriç boğazında Ukrainağa qarşı yapqan «istilânıñ ters areketleri» ve Ukrainada cenk vaziyetiniñ ilân etilmesi aqqında malümat berdi.
Poroşenko, Türkiye prezidentini Ukraina deñizcileri ve gemilerini azat ettirmek içün Rusiyege basqı quvetleştirmesine çağırdı.
Türkiye prezidenti Rusiyeniñ Ukrainağa qarşı istilâiy areketlerini takbih etti, dep haber etile Ukraina prezidentiniñ resmiy saytında.
Subetdeşler Türkiye prezidenti Buenos Aireste G20 sammitinde Ukraina meselesini köterir, dep añlaştılar.
Türkiye prezidentiniñ saytında Ukraina prezidenti ile kerçekleştirgen telefon subeti aqqında haber etilmey.
Ukraina prezidenti Petro Poroşenko Amerikanıñ NBC telekanalına bildirdi ki, NATOnıñ bir qaç gemisi Qara deñizge umumiy telükesizlik maqsadınen kirse, Ukrainağa büyük destek kösterilir.
Ukraina Adalet nazirligi FSB tarafından esir alınğan Ukraina askerlerini qorçalamaq içün Avropa insan aqları mahkemesine muracaat etti.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Noyabrniñ 27-nde Rusiye kontrolindeki Aqmescitniñ Kiyev rayon mahkemesi tutılğan 24 Ukraina askerinden 12-sini apiske aldı. Noyabrniñ 28-nde Qırımdaki mahkeme 3-ünci rang kapitanı Volodımır Lısovıy ve Ukraina telükesizlik hızmetiniñ hadimi Andriy Draçnı eki ayğa, 2019 senesi yanvarniñ 25-ne qadar, apiske aldı. Mahkeme oturışuvı devam ete.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
