Cuma künü, iyülniñ 12-nde, Ukraina Nazirler şurasınıñ 16 yaşını toldurmağan insanlarnıñ ilhaq etilgen Qırımnıñ memuriy sıñırından keçüv tertibine deñişmeler kirsetken №474 qararı işke tüşürildi.
Bu aqta Ukraina prezidentiniñ Qırım Muhtar Cumhuriyetindeki temsilciliginiñ matbuat hızmeti bildire.
Ukraina Nazirler şurasınıñ qararına binaen, 16 yaşını toldurmağan bala Ukraina pasportı ve Ukraina çetel pasportını resmiyleştirmek içün keçiş noqtasında doğuv şeadetnamesini, em de yanında olğan şahısnıñ pasportını kösterip, ilhaq etilgen Qırımdan çıqa bile.
Bütün kerekli vesiqalarnı Devlet migratsion hızmetiniñ bölügine bergen soñ bala ana-babasınen beraber Qırımğa qayta ve pasport vesiqaları azır olacağını bekley.
Qırımdan çıquv Devlet sıñır hızmetiniñ hadimi bergen razılığı esasında olacaq, kirüv ise – bala muracaat etken yerde Devlet sıñır hızmetiniñ territorial bölüginiñ vesiqası esasında.
Bundan evel 16 yaşını toldurmağan balanıñ Qırımdan çıqması içün Ukraina vatandaşı pasportı ya da Ukraina çetel pasportı, ana-babası ya da diger qanuniy vekilinen beraber balanıñ yol vesiqası olmaq kerek edi.
