Kyiv semasında qayd etilgen on Rusiye raketasından doquzı ava mudafaa quvetleri tarafından tüşürildi.
«Raketa ücüminiñ neticeleri. Kyivniñ ava boşluğında 10 raketa qayd etildi. Doquzı yoq etildi. Malümat alına. Ava mudafaa quvetlerimiz yaşasın», – dep aytıla Kyiv şeeri arbiy memuriyetiniñ Telegram kanalında.
Onuncı raketanıñ bir de bir yerge ücüm etkeni aqqında haber etilmey.
Dekabrniñ 5-nde, Rusiye ordusı Ukrayınağa qarşı daa bir ücüm başlatqanda, Kyiv vilâyetiniñ arbiy memuriyeti ava mudafaa sisteması çalışa, dep haber etti. Ava telükesi üç saat devam etti.
Rusiye ordusı noyabrniñ 23-nde de Ukrayınağa qarşı büyük ücüm yaptı. Raketalar bir qaç vilâyetniñ kritik infrastruktura obyektlerine endi.
Bir sıra delil ve şaatlıqqa baqmadan, Moskva büyük istilâ başlağanından berli vatandaşlarğa ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
